Поранешниот министер за надворешни работи на Турција и шеф на турската делегација во Парламентарното собрание на НАТО, Мевлут Чавушоглу, порача дека Европската Унија треба да биде поотворена и поискрена во односот кон земјите кандидати за членство.
На меѓународната конференција „Дијалог за единство и мир 2026“ во Скопје, тој истакна дека ЕУ мора да ги отвори своите институции за државите кои ги исполнуваат критериумите, без дополнителни политички условувања.
Чавушоглу оцени дека кон Македонија биле поставувани низа барања кои, според него, излегуваат надвор од вообичаените преговарачки рамки, вклучувајќи промена на државното име, знамето, како и, како што рече, притисоци поврзани со националниот идентитет.
„Од Македонија се бараше да го промени знамето, името, а сега се бара да прифатат дека не се Македонци. Тоа е нечуено и спротивно на основните вредности на ЕУ“, изјави Чавушоглу.
Тој додаде дека ваквите условувања се нефер кон македонскиот народ и можат да создадат дополнителни поделби во регионот. Според него, Европската Унија треба да го задржи фокусот на критериумите од преговарачките поглавја и да избегнува политички наметнувања надвор од нив.
Во своето обраќање, Чавушоглу нагласи и дека Турција останува посветена на соработката и стабилноста на Западен Балкан, како и на поддршката на евроатлантските интеграции на регионот.
Тој посочи дека Балканот има значаен економски и геостратешки потенцијал како мост меѓу Европа и Азија, додавајќи дека идните транспортни и трговски коридори ќе ја зголемат неговата улога во глобалните текови.
На крајот, Чавушоглу порача дека и самата Европска Унија има потреба од реформи, за да остане атрактивна и конзистентна за земјите кои се стремат кон членство.
…
