Во Собранието денеска по брза постапка беа поднесени измени на Законот за безбедност во сообраќајот со кои се предвидуваат построги правила за користење на електричните тротинети, мопедите и моторциклите.
Според предложените измени, електрични тротинети ќе можат да управуваат исклучиво полнолетни лица, додека максималната дозволена брзина ќе биде ограничена на 20 километри на час, во согласност со европските регулативи.
Предлогот го поднесе координаторот на пратеничката група на ВМРО-ДПМНЕ, Никола Мицевски, заедно со група пратеници. Тој посочи дека во изминатите две и пол години се регистрирани 2.352 сообраќајни незгоди во кои учествувале мопеди, моторцикли и електрични тротинети. Во тие несреќи животот го загубиле 46 лица, а 585 лица се здобиле со тешки телесни повреди.
„Во измените ќе се дефинира што е лесно електрично возило, ќе се пропише дозволената брзина од максимум 20 километри на час, а електрични тротинети ќе можат да возат само полнолетни лица. Ова е со цел да се заштитат младите, бидејќи во половината од несреќите во кои учествувале тротинети се деца на возраст од 16 до 17 години“, изјави Мицевски.
Со законските измени се предвидуваат и построги санкции за прекршителите. Покрај паричните казни, на 30 дена ќе се одземаат електричните тротинети, мопедите или моторциклите од лица кои ќе бидат затекнати да управуваат под дејство на алкохол, од малолетници или од лица кои превезуваат повеќе патници од дозволеното.
Пратениците изгласаа законските измени да се донесуваат по скратена постапка, без разгледување во собраниските комисии. Целта е што побрзо да се воведат новите правила и да се зголеми безбедноста на учесниците во сообраќајот.
…
