79-годишен возач од охридското село Коњско бил лишен од слобода откако под дејство на алкохол предизвикал сообраќајна несреќа во Охрид, при што оштетил шест паркирани возила.
Инцидентот се случил на 25 јуни околу 12:20 часот на булеварот „Туристичка“ во Охрид, кога возачот управувајќи патничко возило „Мерцедес“ со охридски регистарски ознаки удрил во повеќе паркирани автомобили, по што го напуштил местото на настанот и продолжил да вози.
По преземени мерки од страна на полициски службеници од СВР Охрид, возачот бил пронајден на улицата „Питу Гули“, каде бил веднаш приведен.
При алкотестирање кај него биле утврдени 1,51 промили алкохол во крвта. Потоа му биле одземени возачката дозвола и сообраќајните документи, а бил исклучен од сообраќај.
Од Министерството за внатрешни работи информираат дека по целосно документирање на случајот против него ќе биде поднесена соодветна пријава.
…
