Пукање од огнено оружје од возило ги вознемири жителите на Гостивар во текот на ноќта, а неколку часа подоцна 65-годишен гостиварец сам се пријавил во полициската станица. Од него биле одземени пиштол, муниција и рамки, а полицијата работи на целосно расчистување на случајот.
Според информациите од СВР Тетово, инцидентот бил пријавен околу 00:13 часот, кога било пријавено дека непознато лице од патничко моторно возило – џип, испукало неколку истрели од огнено оружје.
По пукањето, возилото се упатило кон центарот на Гостивар. За среќа, во инцидентот нема повредени лица, ниту е пријавена материјална штета.
Околу два часа подоцна, во 02:10 часот, во Полициската станица Гостивар сам се пријавил А.М. (65) од Гостивар.
При полициското постапување, од него бил одземен пиштол марка „Берета“, кој го поседувал со важечка дозвола, една рамка со осум куршуми, како и уште една празна рамка за истото оружје.
Од СВР Тетово информираат дека се преземаат сите потребни мерки и активности за целосно расчистување на случајот.
По завршување на постапката и утврдување на сите околности, против А.М. ќе биде поднесен соодветен поднесок.
