Поради најавените високи температури, Институтот за јавно здравје (ИЈЗ) апелира до граѓаните да ги почитуваат препораките за заштита од топлотниот бран и да преземат мерки за намалување на ризикот од здравствени последици.
Од ИЈЗ советуваат во текот на денот да се затворат прозорците и ролетните, а просториите да се климатизираат кога е тоа возможно. Престојот на директно сонце треба да се избегнува, особено во периодот од 11 до 17 часот, а при излегување се препорачува носење светла и лесна облека.
Доколку престојот на отворено е неизбежен, граѓаните треба почесто да прават паузи во сенка и да избегнуваат подолга изложеност на сончевите зраци.
Институтот препорачува редовно внесување течности во текот на денот, без да се чека појава на чувство на жед. Најдобар избор е водата, а дозволени се и минерални безалкохолни пијалаци. Истовремено, се советува да се избегнуваат алкохол, пијалаци со кофеин и многу ладни напивки.
Во исхраната се препорачуваат полесни оброци, со избегнување масна, висококалорична и храна богата со шеќери. За разладување, ИЈЗ советува туширање со млака вода, користење ладни облоги или потопување на стапалата во ладна вода.
Посебно внимание треба да се посвети на лицата постари од 60 години, бремените жени, децата, лицата со хронични заболувања, работниците кои работат на отворено и социјално ранливите категории. За овие групи е особено важно редовно да ја земаат пропишаната терапија и при каква било промена на здравствената состојба веднаш да се консултираат со матичен лекар.
…
