Екипите на ЈКП „Комуналец“ – Прилеп продолжуваат со активностите за естетско кроење и обликување на зеленилото на повеќе локации во градот.
Во рамки на акцијата се уредуваат зелените површини кај Споменикот на прилепските бранители и во населбата Димо Наредникот, со цел градот да добие поуреден и поатрактивен изглед.
Од ЈКП „Комуналец“ јавно го пофалија својот вработен Пеце Трајкоски и тимот од секторот „Паркови и зеленило“ за нивната посветеност и професионалност.
Според Трајкоски, годинава се врши формирање и подготовка на зеленилото, а веќе следната година Прилеп ќе добие декоративно обликувани зелени фигури.
„Ова лето само го формираме зеленилото и го подготвуваме за следната фаза – можност за обликување во фигури“, посочува Трајкоски.
Од ЈКП „Комуналец“ најавуваат дека активностите за уредување и одржување на зелените површини ќе продолжат и во наредниот период.
…
