Жена била касната од отровната риба-зајак, позната и како лагокефалос, додека влегувала во морето на плажа во Пефкохори, на грчкиот полуостров Халкидики.
Инцидентот се случил додека таа била на плажа со пријатели. Како што изјавила за грчката телевизија ANT1, водата ѝ била до колена кога одеднаш почувствувала силна болка во ногата.
„За среќа, ме касна преку коската на глуждот, па забите не успеаја да навлезат подлабоко во ткивото. Сепак, ми остави голема и видлива рана“, изјавила жената.
Таа веднаш била пренесена во локален здравствен центар, каде што примила серум против тетанус, антибиотска терапија, а лекарите ја исчистиле и санирале раната.
Рибата-зајак (лагокефалос) е инвазивен вид кој во последните години сè почесто се среќава во грчките мориња. Освен што има силни заби со кои може да предизвика сериозни повреди, овој вид е познат и по тоа што содржи опасен токсин, поради што не смее да се консумира.
Надлежните и експертите апелираат до капачите да бидат внимателни, особено во плитките крајбрежни води, и доколку забележат ваква риба, да не се обидуваат да ја допираат или фаќаат.
…
