Израелскиот премиер Бенјамин Нетанјаху упати остри пораки до турскиот претседател Реџеп Таип Ердоган, повикувајќи го „да се смири“ поради неговата реторика кон Израел и оценувајќи дека Турција претставува „оска на Муслиманското братство“.
Во интервју за израелскиот Канал 14, Нетанјаху изјави дека промените во регионот се должат на слабеењето на влијанието на Иран, што, според него, отвора простор за засилување на улогата на Турција.
„Она што се случува во Турција е резултат на слабеењето на моќта на Иран. Иран е екстремна шиитска оска, додека Турција претставува оска на Муслиманското братство – подеднакво екстремно движење. Кога Ердоган зборува за уништување на Израел и повторно владеење со Ерусалим, мислам дека заборава дека 400-годишното османлиско владеење заврши. Денес постои силна држава наречена Израел. Постои израелска армија, народ и влада. Би било мудро да се смири“, изјави Нетанјаху.
Тој нагласи дека Израел нема да дозволи никој да го загрози неговото постоење или безбедност.
„Нема да дозволиме никому да го загрози нашето постоење. Нема да дозволиме никому да ја загрози нашата безбедност. Мислам дека покажавме што можеме“, рече израелскиот премиер.
Во интервјуто, Нетанјаху се осврна и на односите со Египет, коментирајќи го зголеменото египетско воено присуство на Синајскиот Полуостров. Тој посочи дека веќе разговарал со египетските власти и побарал целосно почитување на мировниот договор меѓу двете земји од 1979 година.
Според него, Израел мора истовремено да ги заштити своите граници и да ја зајакнува својата позиција во регионот, особено во услови кога се менува рамнотежата на силите на Блискиот Исток.
…
