Повеќе од 800 лица починале во Германија од последиците на високите температури од почетокот на годината до 21 јуни, соопшти германскиот Институт Роберт Кох.
Според податоците, најголем дел од жртвите биле лица постари од 85 години. Во оваа возрасна група се регистрирани повеќе од 500 смртни случаи, додека кај лицата на возраст меѓу 75 и 84 години починале околу 190 луѓе. Кај помладите од 65 години, евидентирани се околу 40 смртни случаи поврзани со топлината.
Од Институтот наведуваат дека поголемиот број од починатите се жени, што се објаснува со фактот дека во највозрасната категорија има повеќе жени отколку мажи.
Експертите предупредуваат дека бројката може дополнително да се зголеми, бидејќи сè уште не се обработени податоците за најсилниот топлотен бран што ја зафати Германија кон крајот на јуни, кога беше соборен рекордот со измерени 41,7 степени Целзиусови.
Според Институтот Роберт Кох, смртните случаи најчесто се резултат на директен топлотен удар или на комбинација од екстремно високи температури и веќе постоечки здравствени заболувања.
Најголема смртност поврзана со жештините во Германија досега е забележана во 2018 година, кога од високите температури починаа околу 8.000 луѓе.
