На денешната комисиска расправа во Собранието по Предлог-ребалансот на Буџетот за 2026 година, пратеникот на ВМРО-ДПМНЕ, Бојан Стојаноски, истакна дека предложениот ребаланс претставува документ кој ја отсликува реалната состојба во економијата и покажува одговорно управување со јавните финансии.
„Денес не расправаме само за техничка измена на еден буџетски документ. Не расправаме само за бројка плус или бројка минус. Расправаме за Предлог-ребаланс на Буџетот за 2026 година, документ кој покажува како државата се прилагодува на реалните економски движења, како ги следи приходите, како ги контролира расходите и како ги насочува средствата таму каде што создаваат најголема вредност. Овој ребаланс е победа на бројките над манипулациите и документ кој нуди развој и инвестиции“, истакна Стојаноски.
Тој посочи дека со предложениот Ребаланс, вкупните приходи се зголемуваат од 374,9 милијарди денари на 379,5 милијарди денари, што претставува зголемување од 4 милијарди и 575 милиони денари, или 1,2%. Воедно, вкупните расходи се зголемуваат од 414 милијарди и 174 милиони денари на 425 милијарди и 774 милиони денари, што е зголемување од 11 милијарди и 600 милиони денари, или 2,8%.
Стојаноски нагласи дека средствата за капитални инвестиции растат од 40 милијарди и 122 милиони денари на 45 милијарди и 936 милиони денари, што претставува зголемување од 5 милијарди и 814 милиони денари, односно 14,5%.
Дополнително, развојните потпрограми достигнуваат 41 милијарда и 58 милиони денари, што е зголемување од 4 милијарди и 215 милиони денари, односно 11,4%.
Осврнувајќи се на структурата на Предлог-ребалансот, Стојаноски истакна дека бројките јасно ја покажуваат насоката на економските политики.
„Кога ќе го погледнеме Ребалансот бројка по бројка, ставка по ставка, сликата е јасна: приходите растат, но не се напумпани, расходите растат, но има рационализација, стоки и услуги се намалуваат, капиталните расходи растат, социјалната заштита расте, здравството расте, образованието расте, животната средина расте, општините добиваат повеќе, земјоделството добива повеќе“, потенцираше Стојаноски.
…
