Бројот на загинатите во масовниот руски напад врз Киев, извршен во ноќта меѓу 1 и 2 јули, се зголеми на 30, соопшти денеска Украинската државна служба за вонредни ситуации.
Според службите за спасување, под урнатините биле пронајдени уште три тела, со што бројот на жртвите дополнително се зголеми.
Во нападот беа повредени речиси 100 лица, а оштетени се повеќе делови од украинската престолнина. Украинските власти претходно информираа дека биле погодени повеќе од 20 станбени згради, додека околу 100 куќи претрпеле оштетувања.
Украинскиот претседател Володимир Зеленски изјави дека Русија во нападот употребила речиси 500 беспилотни летала и повеќе од 70 балистички ракети, што го прави еден од најинтензивните напади врз Киев од почетокот на војната.
Спасувачките екипи и натаму работат на расчистување на урнатините и потрага по евентуални преживеани.
…
