Големиот шумски пожар што избувна во саботата навечер во близина на северните предградија на Солун, во областа Ореокастро, сè уште не е целосно изгаснат, соопшти Грчката противпожарна служба.
Пламените јазици стигнале многу блиску до куќите во областите од кои граѓаните биле евакуирани во текот на ноќта. Пожарот, освен што зафатил подрачје во близина на фабрика за рециклирање, се проширил и кон текстилна фабрика, што дополнително го зголемило интензитетот на огнената стихија.
Според раководителот на противпожарната служба, Костас Цигас, токму зафатените индустриски објекти придонеле за особено високо термичко оптоварување, поради што пожарот бил исклучително тежок за контролирање.
Со првите зраци на сонцето започнало и воздушното гаснење. Во операцијата се вклучени два авиона и два хеликоптери, а надлежните издале наредба и за дополнителна воздушна поддршка.
Во моментов на терен се ангажирани 154 пожарникари, 52 противпожарни возила и пет пешадиски единици, со поддршка од воздух.
Според првичните проценки, пожарот веќе предизвикал материјални штети, кои на некои места се помали, а на други значително поголеми.
Околу загрозените објекти е распоредена силна противпожарна сила, која постојано ги навлажнува жариштата за да спречи повторно разгорување на огнот во текот на денот.
Тројца пожарникари се здобиле со респираторни проблеми, а еден пожарникар имал ортопедска повреда за време на гаснењето. Сите биле пренесени во општата воена болница за обука, каде ја добиваат потребната медицинска помош.
Од Службата за итна медицинска помош информираат дека здравствениот систем, болниците и екипите на итната помош во регионот се ставени во целосна оперативна готовност. Засега нема информации за други повредени лица.
Грчките власти во текот на ноќта спровеле превентивна евакуација на населението од загрозените делови во областа Ореокастро.
Дополнително, била евакуирана и Фондацијата за хронични болести „Свети Пантелејмон“. Според Противпожарната служба, 100 лица од установата биле префрлени во зграда на средно училиште, додека преостанатите 57 биле пренесени во Психијатриската болница во Солун.
Во рамки на истрагата, грчките власти привеле 76-годишен грчки државјанин, кој се смета за главен осомничен за избувнувањето на пожарот.
Според првичните информации, постои сомнение дека пожарот можел да биде предизвикан од неговото „опасно возење“, односно дека искри од неговото возило можеби ја запалиле сувата вегетација.
Мажот е задржан на дополнително испрашување, а се проверува и дали во моментот на инцидентот бил под дејство на алкохол или други супстанции, бидејќи постојат индиции дека не бил во трезна состојба.
Истрагата и предистражната постапка продолжуваат, а надлежните органи работат на целосно расветлување на околностите под кои избувнал пожарот.
Паралелно со пожарот во Ореокастро, активни се и неколку други пожари во поширокиот регион на Солун.
Огнени жаришта се регистрирани и на полуостровот Халкидики, едно од најпознатите летни одморалишта во Грција, како и во областа околу градот Кукуш.
Грчките власти остануваат во состојба на зголемена готовност, бидејќи високите температури, сувата вегетација и ветерот го зголемуваат ризикот од ново ширење на пожарите.
