Голем шумски пожар избувна во регионот на селото Дриз, во близина на албанскиот град Фиер, предизвикувајќи сериозни материјални штети и принудувајќи ги властите да евакуираат 11 семејства поради опасност од ширење на огнената стихија.
Според информациите од албанските власти, пожарот уништил повеќе куќи, а силниот ветер дополнително ја влошил состојбата, овозможувајќи пламенот за кратко време да се прошири кон околните шумски подрачја и неколку соседни села.
Поради опасноста, полицијата целосно го затвори сообраќајот на патниот правец Ќафа е Кошовица – Цакран, со цел да се овозможи непречена интервенција на спасувачките екипи и да се заштитат граѓаните.
Според официјалните информации, пожарот првично избувнал во близина на местото викано „Азотик“ во селото Дриз, по што, поттикнат од силниот ветер и високите температури, брзо излегол од контрола.
Во гаснењето на пожарот се вклучени голем број противпожарни единици од Фиер и соседните градови, припадници на специјалната полициска единица „Шќипоња“, како и војници на албанската армија.
Од воздух интервенираат два армиски хеликоптери кои ги гаснат најкритичните жаришта и се обидуваат да го спречат натамошното ширење на огнот.
На терен се распоредени и екипи на Итната медицинска помош, кои се во целосна подготвеност за брза интервенција доколку има потреба.
Засега нема официјални информации за повредени или загинати лица, но материјалната штета е значителна, а пожарникарите и натаму водат тешка битка со пламените јазици.
Надлежните служби внимателно ја следат состојбата и апелираат граѓаните да ги почитуваат безбедносните препораки и да не се приближуваат до зафатените подрачја додека трае интервенцијата.
