Министерството за внатрешни работи го објави јавниот повик за прием на 200 ученици во новото државно Средно полициско училиште – Полициска академија за учебната 2026/2027 година, со што по пауза од 26 години повторно се враќа средното полициско образование во Македонија.
Под мотото „Облечи ја униформата со гордост!“, МВР ги повикува заинтересираните ученици да конкурираат за новата генерација, која ќе се школува во училиштето „7 Мај“, именувано по Денот на македонската полиција.
Последната генерација средношколци за полицајци завршила во периодот 1996–2000 година, по што тогашниот Центар за образование на кадри од областа на безбедноста „Елисие Поповски-Марко“ бил укинат.
Кој може да се пријави?
Право на пријавување имаат ученици кои имаат завршено втора година во кое било четиригодишно средно училиште во државата.
Наставата ќе се одвива во Центарот за обука на МВР – Полициската академија во Идризово, каде учениците ќе престојуваат во интернат и ќе следат стручни и општообразовни предмети.
Најголемата предност е што по успешно завршување на образованието и полагањето на матурата, Министерството за внатрешни работи ќе им обезбеди работно место како полицајци.
Јавниот повик е објавен на 3 јули и ќе биде отворен 15 дена.
Кандидатите ќе треба да поминат селекција во три фази:
– проверка на моторички способности,
– писмен општообразовен тест,
– индивидуално интервју.
Сите фази ќе се реализираат во Полициската академија, а секој кандидат ќе добива бодови врз основа на постигнатите резултати.
Условите што мора да ги исполнуваат кандидатите
За да конкурираат, кандидатите треба:
– да се државјани на Република Северна Македонија;
– да немаат наполнето 18 години на денот на објавувањето на конкурсот;
– активно да го користат македонскиот јазик;
– да бидат здравствено и психофизички способни.
Дополнително, потребно е:
– да имаат најмалку „добар“ општ успех во првата и втората година од средното образование;
– да немаат изречени педагошки мерки;
– успешно да ги поминат сите три селекциски фази.
Пријавите ги поднесуваат родителите или старателите, заедно со целокупната потребна документација.
Документите можат да се достават во СВР Скопје (полициските станици Гази Баба, Бит Пазар и Карпош), како и во секторите за внатрешни работи во Битола, Велес, Куманово, Тетово, Охрид, Струмица и Штип.
Конечната ранг-листа ќе биде изработена врз основа на освоените бодови од сите три селекциски фази и ќе биде објавена на огласната табла на училиштето и на веб-страницата на МВР.
Помошникот на министерот во Центарот за обука на МВР, м-р Влатко Митковски, изјави дека интересот е исклучително голем и дека секторите за внатрешни работи веќе се преплавени со пријави.
„Очекуваме сите 200 места да бидат пополнети и конкуренцијата да биде голема, што ќе овозможи квалитетна селекција. Очекуваме целиот процес да заврши до средината на август, по што учениците ќе имаат краток период да ги завршат административните процед
