На граничните премини кон Хрватска, изборот на погрешна колона може да резултира со сообраќаен прекршок и парична казна, предупредуваат информации од регионални медиуми и пракса на граничните служби.
Иако на прв поглед изгледа како побрзо решение, лентата означена со „EU/EEA/CH“ не е наменета за сите патници. Таа е резервирана за граѓани на Европската унија, Европската економска област и Швајцарија, како и за лица со право на слободно движење според европските правила.
Возачите од земји кои не се членки на ЕУ, меѓу кои и државјаните од регионот, треба да ги користат лентите означени како „All Passports“, „Svi pasoši“ или „Others“. Погрешното престројување, дури и кога е ненамерно, може да се смета за прекршување на сообраќајната сигнализација на граничниот премин.
Според информации што ги пренесуваат регионални медиуми, веќе има случаи каде возачи биле казнети со околу 60 евра поради влегување во погрешна лента. Во одредени случаи, доколку казната се плати веднаш, износот може да биде намален.
Со воведувањето на европскиот Entry/Exit System (EES), контролата на границите дополнително се заострува, а правилното насочување на возилата станува уште поважно за непречено функционирање на премините.
Граничните служби апелираат возачите внимателно да ги следат сообраќајните знаци, електронските табли и упатствата на полициските службеници, бидејќи правилото важи за целото возило – ако само еден патник нема право на користење на ЕУ/ЕЕА/Швајцарија лентата, возилото треба да се упати во соодветната колона.
Неправилниот избор на лента може да значи и губење време и дополнителни трошоци, особено во летните месеци кога граничните премини се оптоварени.
…
