Инфлацијата во јуни забележа месечен пад од 0,5 отсто, најмногу поради поевтинувањето на храната и горивата. Сепак, на годишно ниво трошоците на животот и натаму растат и се за 3,4 насто повисоки отколку во јуни лани, покажуваат најновите податоци на Државниот завод за статистика.
Во однос на мај, најголемо намалување на трошоците е регистрирано кај транспортот, каде што цените се пониски за 1,6 проценти, додека храната и безалкохолните пијалаци поевтиниле за 1,1 процент. Оттаму и најголемиот импулс за месечното спуштање на инфлацијата во негативна зона.
Од друга страна, најголем месечен раст е забележан кај рекреацијата, спортот и културата – цените се повисоки за 1,4 проценти. Следуваат личната нега, социјалната заштита и разновидните услуги со раст од 0,5 проценти, додека покуќнината, опремата за домаќинствата, рестораните и хотелските услуги поскапеле за 0,3 проценти. Кај здравствените услуги и телекомуникациите има раст од 0,2 проценти, а кај облеката и обувките за 0,1 процент.
На годишно ниво најголемо поскапување има кај алкохолните пијалаци и тутунот. Цените се зголемени за 9,3 проценти. Во транспортот е регистриран раст од 6,2 проценти, кај рестораните и хотелските услуги 4,9 проценти, покуќнината – 4,2 проценти и во областа на рекреацијата, спортот и културата – 5,1 процент.
Храната и безалкохолните пијалаци, како најзначајна ставка во потрошувачката кошничка на годишно ниво се поскапи за 2,5 проценти, а домувањето, електричната енергија, водата и гасот бележат раст од 2,8 проценти.
Индексот, пак, на цените на мало во јуни е намален за 0,8 проценти во споредба со мај, но на годишно ниво бележи раст од 3,6 проценти.
