Европскиот парламент усвои реформа со која се зајакнуваат правата на патниците во воздушниот сообраќај. Новите правила носат промени за милиони патници кои патуваат со авиони во рамките на Европската Унија, со поголема транспарентност при купување билети и полесно барање обесштетување при проблеми со летовите.
Една од најважните новини е што родителите повеќе нема да мораат дополнително да плаќаат за да седат до своите деца во авионот. Авиокомпаниите ќе треба да овозможат бесплатно сместување на децата и придружните возрасни лица на соседни седишта.
Со ова треба да се стави крај на практиката семејствата да бидат разделувани во авионот доколку не платат дополнителна такса за избор на седиште.
Крај на непријатните изненадувања при купување билет
Новата регулатива предвидува авиокомпаниите однапред јасно да ги прикажуваат сите трошоци поврзани со патувањето. Патниците ќе мора да знаат колку точно ќе платат уште пред да ја завршат резервацијата.
Посебно ќе треба да бидат наведени дополнителните услуги, како избор на седиште, багаж или други трошоци кои досега често се појавуваа дури во последните чекори од купувањето.
Полесен пат до надомест за доцнење и откажување летови
Патниците и понатаму ќе имаат право на финансиски надомест доколку летот доцни најмалку три часа по вина на авиокомпанијата.
Предвидените суми за обесштетување остануваат:
- 250 евра за летови до 1.500 километри;
- 400 евра за летови до 3.500 километри;
- 600 евра за подолги летови над 3.500 километри.
Право на надомест може да има и при откажување на лет доколку авиокомпанијата го известила патникот непосредно пред планираното патување.
Авиокомпаниите ќе мора да ги информираат патниците
Со новите правила, превозниците ќе имаат обврска активно да ги информираат патниците за нивните права. Компаниите ќе треба да објаснат каде и како може да се поднесе барање за компензација.
По поднесено барање, авиокомпанијата ќе има рок од 30 дена да го исплати надоместот или да даде образложение доколку го одбие барањето.
Без надомест во вонредни ситуации
Компензација нема да следува во случаи кога доцнењето или откажувањето е предизвикано од околности надвор од контролата на авиокомпанијата, како природни катастрофи или сериозни безбедносни ризици.
Сепак, штрајкови на вработени во самата авиокомпанија и голем дел од техничките проблеми нема автоматски да бидат причина компанијата да избегне исплата.
Рачниот багаж останува без единствена големина
Европратениците не го прифатија предлогот за воведување унифицирани димензии за рачен багаж кај сите авиокомпании. Сепак, превозниците ќе мора јасно да наведат дали багажот е вклучен во цената на билетот или се плаќа дополнително.
Новите правила ќе важат за авиокомпании од ЕУ, како и за неевропски превозници кои полетуваат од аеродроми во Унијата.
Реформата треба да стапи во сила по формалното одобрување од земјите членки, а авиокомпаниите ќе добијат рок од 12 месеци за усогласување со новите барања.
…
