Тензиите меѓу САД и Иран повторно ескалираа откако американската Централна команда (CENTCOM) соопшти дека започнала воздушни напади врз цели на иранска територија, наведувајќи дека акцијата е одговор на, како што тврди Вашингтон, нападите врз три трговски брода што пловеле низ Ормускиот Теснец.
Во соопштението објавено на социјалната мрежа X, CENTCOM наведе дека целта на операцијата е Иран да сноси последици за, според американските власти, нападите врз цивилни трговски бродови на еден од најважните меѓународни поморски коридори.
Во меѓувреме, иранските медиуми јавија дека во неколку области во јужниот дел на земјата се слушнале силни експлозии, но засега нема официјални информации за евентуални жртви или причинета материјална штета.
Ескалацијата доаѓа откако САД повторно воведоа санкции за извозот на иранска нафта. Од Вашингтон порачаа дека нападите врз бродови во Ормускиот Теснец се неприфатливи и дека Иран ќе се соочи со последици.
Од друга страна, иранското Министерство за надворешни работи остро ја осуди одлуката на САД, оценувајќи дека повторното воведување на санкциите претставува прекршување на меморандумот за разбирање и договорот за прекин на огнот. Техеран соопшти дека ќе ги преземе сите неопходни мерки за заштита на своите национални интереси и безбедност.
Според претходните договори, САД и Иран на 17 јуни постигнаа привремен договор за прекин на огнот, потпишан во Швајцарија со посредство на Пакистан, по неколкумесечен вооружен конфликт. Сепак, најновите случувања отвораат прашања за иднината на договорот и можноста за нова ескалација на кризата.
…
