Најстариот син на израелскиот премиер Бенјамин Нетанјаху, Јаир Нетанјаху, официјално го променил своето име и презиме во Јонатан Хун, објави израелскиот весник „Хаарец“, повикувајќи се на официјални даночни документи.
Според објавените информации, даночната пријава за 2026 година била поднесена под новото име, но со истиот матичен број и истата адреса како пријавата од 2024 година, која била поднесена под неговото родено име.
Израелските закони предвидуваат дека по официјална промена на името, лицето не може повторно да го промени во наредните седум години. Засега не е познато дали Јонатан Хун ќе го користи новото име во јавноста или промената е направена од лични причини, бидејќи на своите профили на социјалните мрежи и понатаму се претставува како Јаир Нетанјаху.
Новото име има силна семејна симболика. Името Јонатан го носел неговиот чичко Јонатан (Јони) Нетанјаху, брат на премиерот Бенјамин Нетанјаху, кој загина во 1976 година за време на познатата операција „Ентебе“, во која израелските специјални сили ослободија заложници држени во Уганда.
Презимето Хун, пак, потекнува од неговиот дедо по мајчина линија, Шмуел Бен-Арци, кој пред хебреизацијата на презимето се викал Самуел Хун.
„Хаарец“ наведува дека Јаир веќе подолго време го користел презимето Хун на дел од своите профили на социјалните мрежи, но причината поради која токму сега решил и официјално да го усвои не е позната.
Триесет и четиригодишниот Јаир Нетанјаху е познат како десничарски политички активист и водител на подкасти. Во последните неколку години живее во американската сојузна држава Флорида и често привлекува внимание со своите контроверзни објави на социјалните мрежи, како и со контактите со крајно десничарски политичари и јавни личности во Европа и САД.
И неговиот помлад брат Авнер претходно официјално го променил своето име. По купувањето стан во Лондон, во британскиот земјишен регистар бил запишан како Ави Сегал, користејќи законски одобрен псевдоним преземен од моминското презиме на неговата баба по таткова линија. Минатата година тој изјави дека промената ја направил од безбедносни причини за време на студиите во британската престолнина.
И самиот Бенјамин Нетанјаху во текот на студиите на Технолошкиот институт во Масачусетс (MIT) во 1970-тите го користел името Бенџамин „Бен“ Нитаи, објаснувајќи подоцна дека тоа го направил за полесно изговарање на неговото презиме во САД.
