Во Основниот суд во Куманово денеска започна судскиот процес против 25-годишниот Трајко Бојковски од Старо Нагоричане, кој се соочува со обвиненија за четири убиства и два обида за убиство на повозрасни жени во Кумановскиот Регион.
По завршувањето на првото рочиште, јавниот обвинител Љубомир Лапе изјави дека станува збор за случај без преседан во домашната судска практика. Според обвинението, главниот мотив за извршените злосторства била некрофилија, односно задоволување на полови страсти врз телата на жртвите по нивната смрт.
Обвинителот посочи дека вакви случаи се исклучително ретки и во светската судска практика и дека токму такви предмети биле анализирани при подготовката на обвинението. Како што истакна, обвинителството ќе се обиде да го докаже мотивот преку обдукциските наоди, психијатриското вештачење, како и исказите на двете жени кои ги преживеале нападите.
На новинарско прашање дали обвинетиот ја признал вината во текот на истрагата, обвинителот не даде одговор, образложувајќи дека не може да коментира детали пред доказите да бидат презентирани во судската постапка.
За време на денешното рочиште, Бојковски беше спроведен во судницата со полициска придружба и со лисици на рацете. Додека медиумите го снимаа, седеше мирно, се нишаше на столицата и гледаше кон таванот, без видлива реакција на присуството на јавноста.
Според обвинението, првото убиство било извршено во јануари 2025 година во селото Клечовце. Потоа следувале уште три убиства во Драгоманце, Старо Нагоричане и Челопек, како и два обида за убиство во Челопек. Обвинителството тврди дека сите жртви биле повозрасни и немоќни жени, а делата биле извршени со умисла и од особено ниски побуди.
Доколку биде прогласен за виновен, обвинетиот може да биде осуден на затворска казна од најмалку десет години или на доживотен затвор.
Обвинителот информираше и дека во Вишото јавно обвинителство во Скопје се води посебна постапка за утврдување евентуална одговорност на лекари кои, според наводите, не констатирале дека смртта на дел од жртвите била насилна. Поради тоа, тие првично биле погребани како лица кои починале од природна смрт, а подоцна нивните тела биле ексхумирани за дополнителна истрага.
Следното судско рочиште е закажано за 31 август, кога ќе продолжи доказната постапка.
