Повеќе од 30 лица се повредени во тешка сообраќајна несреќа што се случи во американската држава Мериленд, кога автобус на јавниот превоз удрил во неколку возила, изгубил контрола и се забил во зграда.
Несреќата се случила во четвртокот, кратко пред 18 часот по локално време, во местото Пајксвил, северозападно од Балтимор, пренесуваат американските медиуми.
Според информациите од полицијата на округот Балтимор, автобусот на Управата за јавен превоз на Мериленд најпрво удрил во повеќе возила, по што излетал од коловозот и завршил во објект покрај патот.
Возачот на автобусот се здобил со тешки повреди опасни по живот и е пренесен во болница, додека уште 35 лица биле хоспитализирани поради повредите здобиени во несреќата.
Во инцидентот биле вклучени вкупно 12 возила, а надлежните служби веднаш интервенирале на местото на настанот. Причините за несреќата засега не се познати и се предмет на истрага.
Гувернерот на Мериленд, Вес Мур, соопшти дека внимателно ја следи ситуацијата и им изрази благодарност на службите за итни случаи за брзата реакција. Тој додаде дека државните власти остануваат во координација со локалните институции за да обезбедат сета неопходна поддршка за повредените и нивните семејства.
