Грција и ова лето останува една од најпосакуваните дестинации за македонските туристи, но летувањето таму ќе бара поголем буџет. Поскапувањата се забележуваат и кај сместувањето, и кај храната, особено во туристичките места.
Еден од омилените оброци на туристите – гирото – веќе се продава по цена од околу 5 евра на повеќето локации на Халкидики. Во поатрактивните туристички центри, особено во шпицот на сезоната, цената може да биде и повисока. Порција гиро во рестораните често достигнува 10 евра или повеќе.
Дополнителен трошок за туристите е и сместувањето. Според туристичките агенции, цените на аранжманите за Грција се зголемени во однос на минатата година за околу 10 до 20 проценти. За студио или апартман во сезона најчесто се потребни најмалку 60 евра за едно ноќевање, зависно од местото и периодот на престој.
Од туристичкиот сектор велат дека посетителите треба однапред да планираат повисоки трошоци за секојдневните потреби, бидејќи инфлацијата влијаеше врз цените во рестораните, таверните и локалите за брза храна.
Сепак, дел од производите во грчките супермаркети немаат значително повисоки цени од оние во Македонија. Кај некои артикли цените се слични, а во одредени случаи може да се најдат и поповолни понуди.
Во текот на летната сезона, грчката влада постигна договор со трговските синџири и производителите да нема нови поскапувања на голем број основни прехранбени производи во јули и август. Околу 2.000 производи со намалени цени ќе останат со истите цени во текот на летото.
Според актуелните цени, лебот во Грција чини околу 1 до 1,5 евра, багет околу 1,3 евра, грчка пита до 2,35 евра, килограм домати од 1,3 до 2 евра, а пилешкото месо се движи од 5,1 до 7,5 евра за килограм.
И покрај зголемените трошоци, интересот за летување во Грција останува голем. Минатата година земјата ја посетиле повеќе од 900.000 туристи од Македонија, со што македонските гости се меѓу најбројните посетители на грчкото крајбрежје.
…
