Премиерот Христијан Мицкоски денеска изврши увид во градежните активности за реконструкција на СОУ „Св. Климент Охридски“, како и во реконструираната улица „Кленоец“ во Општина Охрид, при што порача дека градот се развива преку инвестиции и реализација на проекти.
„Гледаме дека се работи, се инвестира, Охрид се развива и полека, но сигурно го добива заслуженото место кое како град му припаѓа“, изјави Мицкоски.
Тој посочи дека пуштањето во употреба на новите делници од автопатот Кичево–Охрид ќе придонесе за подобра поврзаност на градот со останатите делови од државата и за зголемување на бројот на туристи.
„Очекувам оваа есен да биде пуштена делницата од Извор до Врбјани, а доколку сè оди според планот, во првиот квартал од следната година да биде пуштена и целата автопатска делница која ќе ги поврзе Кичево и Охрид“, рече премиерот.
Според него, со подобрата патна инфраструктура ќе се намали времето на патување од повеќе градови во Македонија до Охрид, што ќе има позитивен ефект врз туризмот и локалниот развој.
Мицкоски му честиташе на градоначалникот на Охрид за досегашната работа и за проектите кои се реализираат, додавајќи дека за развојот на градот е потребна соработка меѓу локалната и централната власт.
„Благодарност до советниците, администрацијата, пратениците од Охрид и колегите од Владата кои придонесуваат градот да добие повеќе проекти“, истакна Мицкоски.
Тој додаде дека Владата и локалната самоуправа ќе продолжат со инвестиции во Охрид, со цел подобрување на условите за живот на граѓаните и создавање дополнителна вредност за градот.
