Објавена мапа: Еве каде во Грција е забележана опасната „риба зајак“

Токсичната инвазивна риба Lagocephalus sceleratus, позната како „риба зајак“, продолжува да се шири низ грчките морски подрачја, а експертите повторно упатуваат предупредувања до граѓаните и туристите.

Според грчките медиуми, овој вид првпат бил забележан во грчките води во 2005 година, а во изминатите години неговото присуство е регистрирано во голем број области – од островите до различни делови од крајбрежјето.

За полесно следење на распространетоста на инвазивниот вид, грчката мрежа за рано предупредување за инвазивни видови ELNAIS објави интерактивна дигитална мапа на која се означени досега потврдените места каде е пронајдена „рибата зајак“. На мапата се вклучени локации на Крит, во Егејското Море и во други грчки морски области.

Оваа риба во Средоземното Море пристигнала преку Суецкиот Канал, мигрирајќи од Црвеното Море, а оттогаш нејзината популација значително се зголемила.

Морските биолози предупредуваат дека видот може сериозно да ја наруши природната рамнотежа бидејќи се храни со локални морски организми и нема доволно природни непријатели кои би ја ограничиле нејзината бројност.

Поради брзото ширење, грчките власти разгледуваат мерки за контрола на популацијата, меѓу кои и финансиска поддршка за професионалните рибари кои ќе ја ловат оваа инвазивна риба.

Од грчкиот Црвен крст потсетуваат дека „рибата зајак“ не е отровна при допир, но нејзините исклучително силни вилици можат да предизвикаат сериозни повреди и силно крвавење.

Граѓаните и туристите се советуваат да не ја допираат доколку ја забележат во морето или при улов.

…