Иако просечната нето плата во Хрватска продолжува да расте, голем дел од граѓаните велат дека сè потешко ги покриваат секојдневните трошоци. Според податоците, медијалната нето плата во земјата изнесува 1.319 евра, што значи дека половина од вработените примаат помалку од оваа сума.
Во Загреб, каде што просечната плата достигнала 1.782 евра, медијалната плата е 1.495 евра. И покрај тоа што главниот град има највисоки примања, многумина велат дека високите животни трошоци не им дозволуваат да заштедат.
Граѓаните во различни делови од земјата сведочат дека најголемиот дел од приходите ги трошат на основните животни потреби. Некои велат дека можат да заштедат само ако се откажат од дел од секојдневните трошоци, додека други признаваат дека воопшто не успеваат да остават пари настрана.
Состојбата е уште потешка надвор од Загреб. Во Риека, Сплит и особено во Осиечко-барањската жупанија, платите се значително пониски. Во оваа жупанија просечната плата е за повеќе од 300 евра пониска отколку во главниот град.
Економскиот аналитичар Петар Вушковиќ оценува дека иако платите и вработеноста бележат раст, тоа не е доволно за да го следи поскапувањето на животот. Според него, растот на цените, особено на услугите, дополнително го намалува просторот за штедење.
Проценките покажуваат дека просечниот граѓанин месечно заштедува околу 150 евра, но оваа бројка не ја отсликува реалната состојба, бидејќи многумина воопшто не успеваат да заштедат.
Економистите предупредуваат дека вистинскиот показател за животниот стандард не е само висината на платата, туку и тоа колку пари им остануваат на граѓаните по покривањето на основните животни трошоци.
…
