Англиската фудбалска репрезентација е на чекор до историски успех на Светското првенство, а евентуалното освојување на титулата ќе донесе и огромни финансиски бонуси за играчите и стручниот штаб.
Според британските медиуми, доколку „Гордиот Албион“ стане светски шампион, Англиската фудбалска асоцијација ќе исплати околу 19 милиони фунти во бонуси. Од оваа сума, приближно 15 милиони фунти ќе бидат распределени меѓу фудбалерите, околу 3 милиони ќе му припаднат на селекторот Томас Тухел, а околу 1 милион ќе добие неговиот стручен штаб.
Износот што ќе го добие секој репрезентативец ќе зависи од бројот на одиграни минути на турнирот. Доколку средствата се поделат рамномерно, секој фудбалер би инкасирал околу 577.000 фунти.
ФИФА за ова Светско првенство значително го зголеми наградниот фонд, кој сега изнесува 655 милиони долари. Новиот светски шампион ќе добие 50 милиони долари, што е значително повеќе од 32-те милиони долари што ги освои Аргентина по триумфот на Мундијалот во 2022 година.
Висината на бонусите повторно ја отвори темата за разликите во наградите меѓу машката и женската репрезентација на Англија, откако женската селекција пред Светското првенство во 2023 година побара подобри финансиски услови.
Инаку, англиските репрезентативци за секој настап добиваат по 2.000 фунти, но тие средства традиционално ги донираат во добротворни цели.
