Владата повторно разгледува можност за намалување на акцизите на горивата, откако растот на цената на нафтата на светските берзи создаде нов притисок врз цените на енергенсите.
Премиерот Христијан Мицкоски денеска изјави дека по анализата на движењата на берзите во првите 15 дена, веќе од понеделник може да биде донесена одлука за намалување на акцизите за безоловниот бензин и дизелот.
„Ние сето тоа го антиципираме. Кризната состојба е до 20 јули. Мислам дека веќе се исполнети условите од понеделник да имаме повторно намалување на акцизите за безоловниот и за дизелот“, рече Мицкоски.
Тој посочи дека Владата останува посветена на политиките за заштита на стандардот на граѓаните, особено во услови на нови геополитички тензии и неизвесност на енергетските пазари.
Според премиерот, Македонија во моментов има едни од најниските цени на горивата во регионот, а причината ја гледа во мерките што ги презема Владата.
„Цената на горивата е берзанска. Од истите пазари купуваат и Германија и другите европски држави, но разликите во крајните цени се резултат на политиките што се водат во одделните земји“, изјави Мицкоски.
Тој додаде дека цените на горивата во некои соседни држави се значително повисоки, нагласувајќи дека целта на Владата е да продолжи со мерки што ќе обезбедат помало оптоварување за граѓаните.
…
