Градоначалникот на Општина Прилеп, Дејан Проданоски, истакна дека во изминатите девет месеци локалната самоуправа реализирала значајни активности и обезбедила инвестиции во вредност од 990 милиони денари за капитални проекти.
Според Проданоски, преку развојните програми се обезбедени средства за реализација на повеќе инфраструктурни зафати, додека над 15 милиони денари биле вложени за изработка на проектна документација, како основа за идните инвестиции.
Тој посочи дека успешно е завршена и најголемата јавна набавка во вредност од 168 милиони денари, наменета за рехабилитација на улици, тротоари и локални патишта, при што реализацијата на проектите ќе започне во наредниот период.
Проданоски најави дека во тек се подготовките за повеќе капитални проекти кои, како што наведе, со години биле очекувани од прилепчани. Меѓу нив се комплетна реконструкција на подземната инфраструктура и асфалтирање на централното градско јадро кај Орта Џамија, подготовка на проектите за обиколницата „Запад“ и индустриската зона „Комфи Ангел“, како и проект за проширување на малото мовче на улицата „Цане Илиески“, кое треба да прерасне во трет мост со цел да се намали сообраќајниот метеж.
Дополнително, во подготовка се и проекти за реконструкција на улиците „Александар Македонски“, „Зеленгора“ и „Егејска“, како и за целосна обнова на инфраструктурата во населбата „Сточен Пазар“, заедно со повеќе други проекти што се во различни фази на реализација.
„Секојдневно сум на терен, меѓу граѓаните. За мене нема затворени врати, ниту неважни прашања. Тука сум да го слушнам секој предлог, секоја идеја и секоја забелешка, затоа што само заедно можеме да го изградиме Прилеп каков што го заслужуваме“, порача градоначалникот Проданоски, додавајќи дека локалната самоуправа ќе продолжи да работи посветено и одговорно.
ВИДЕОТО МОЖЕ ДА ГО ПОГЛЕДНЕТЕ ТУКА
…
