Украинските сили за беспилотни системи соопштија дека во изминатите 12 дена погодиле 159 бродови поврзани со руската таканаречена „флота во сенка“, која Москва ја користи за транспорт на нафта и товар надвор од системот на меѓународни санкции.
Според командантот на украинските Сили за беспилотни системи, Роберт Бровди, нападите се дел од операцијата „Молочко“, чија цел е нарушување на руската поморска логистика во Црното и Азовското Море.
Бровди информираше дека само во една ноќ биле погодени 12 пловила – девет товарни бродови, еден танкер, еден танкер за гас и еден влекач. Вкупната бројка на погодени бродови, според украинските податоци, изнесува 159, од кои 117 во Азовското и 42 во Црното Море.
Украинската страна наведува дека целта не е потопување на бродовите, туку нивно оневозможување, со цел да се избегнат можни еколошки последици од истекување на нафта и гориво.
„Целта е да се парализира логистиката за транспорт на нафта, гориво и товар, која се користи за заобиколување на санкциите“, изјави Бровди, додавајќи дека операцијата е насочена кон создавање нефункционална флота.
Според Киев, станува збор за помали и средни танкери кои се користат за транспорт на руска нафта преку Волга-Донскиот канал и Азовското Море до поголеми бродови во Црното Море.
Украина тврди дека „флотата во сенка“ има клучна улога во финансирањето на руските воени активности, бидејќи овозможува продолжување на извозот на енергенси и покрај санкциите воведени од западните земји.
Од Москва, пак, ги осудија нападите и ги оценија како незаконски. Рускиот министер за надворешни работи Сергеј Лавров изјави дека дејствијата на Украина претставуваат „терористички напади“, додека Киев ги отфрла ваквите обвинувања и тврди дека станува збор за легитимни воени операции против инфраструктура поврзана со руската воена економија.
Европските држави во последниот период ги засилуваат мерките против руската „флота во сенка“, за која се проценува дека брои стотици до над илјада бродови и се користи за избегнување на ограничувањата врз рускиот извоз на нафта.
…
