Здравствените власти ќе прогласат епидемија на заразна болест на подрачјето на Гостивар, откако наглиот пораст на заболени со симптоми на гастроентероколит ја вклучи алармантната состојба во сите надлежни институции. Одлуката има за цел да овозможи поефикасна координација, побрза реакција и целосна контрола на состојбата, додека паралелно продолжува истрагата за можниот извор на заразата.
Раководителот на Одделот за епидемиологија на заразни заболувања при Институтот за јавно здравје, д-р Драган Кочински, изјави дека сите превентивни и надзорни мерки веќе се спроведуваат на терен, а формалното прогласување епидемија ќе овозможи уште поефикасна меѓуинституционална соработка во справувањето со кризата.
Досега официјално се пријавени 140 лица со симптоми на заразна болест. Дел од нив веќе се епидемиолошки анкетирани, додека за останатите постапката е во тек и ја спроведуваат тимови на епидемиолози од Центарот за јавно здравје – Гостивар и Институтот за јавно здравје.
Дополнителна загриженост предизвикува фактот што преку националниот систем „Алерт“ е регистрирано надминување на неделниот епидемиолошки праг за заболени на територијата на Гостивар, што беше еден од клучните показатели за носење одлука за прогласување епидемија.
Во меѓувреме, Институтот за јавно здравје е во постојана координација со Центарот за јавно здравје Тетово – Подрачна единица Гостивар, Министерството за здравство, Основното јавно обвинителство Гостивар и Министерството за внатрешни работи.
По налог на Јавното обвинителство, стручни екипи извршија увид на посочените локации и зедоа примероци од водата за микробиолошки и физичко-хемиски анализи. Испитувањата започнаа веднаш по враќањето на екипите во лабораториите во раните утрински часови, а резултатите се очекува утре и ќе бидат доставени до Јавното обвинителство, кое потоа ќе донесе одлука за натамошното постапување.
Одделот за епидемиологија при Институтот за јавно здравје е во постојана комуникација со епидемиолозите во Гостивар, при што се дадени насоки за спроведување на епидемиолошките анкети и земање мостри од пациентите за микробиолошка анализа. Институтот ги ставил на располагање сите свои стручни и лабораториски капацитети со цел што побрзо да се утврди причината за појавата на болеста.
Во меѓувреме, Агенцијата за храна и ветеринарство уште на 17 јули издаде привремена забрана за употреба на водата за пиење од гостиварскиот водоводен систем поради основано сомнение дека водата е небезбедна за употреба. На граѓаните и понатаму им се препорачува водата да не ја користат за пиење и подготовка на храна сè додека надлежните институции официјално не потврдат дека е безбедна.
Од Основното јавно обвинителство Гостивар потврдуваат дека активно постапуваат по пријавата за квалитетот на водата за пиење. Локацијата во Вруток и понатаму е обезбедена по наредба на јавен обвинител, а конечната одлука за натамошните чекори ќе биде донесена веднаш по добивањето на лабораториските резултати.
Надлежните институции апелираат граѓаните строго да ги почитуваат сите препораки и да избегнуваат користење на водата од водоводниот систем сè додека не завршат анализите и не се утврди точната причина за појавата на заразата.
