Двете најголеми социјални мрежи во сопственост на Meta – Фејсбук и Инстаграм – утрово се соочија со сериозен глобален технички дефект, поради кој милиони корисници ширум светот, меѓу кои и во Македонија, имаат проблеми со пристапот до своите профили.
Прекинот започнал околу 10 часот по македонско време, а најпогодена е десктоп верзијата на Фејсбук. При обид за најава или освежување на страницата, корисниците добиваат бел екран и системска порака дека нивниот налог е привремено недостапен поради проблем со платформата.
„Налогот е привремено недостапен. Вашиот налог моментално не е достапен поради проблем со страницата. Очекуваме проблемот наскоро да биде решен. Обидете се повторно за неколку минути“, гласи пораката што им се прикажува на дел од корисниците.
Според специјализираната платформа Downdetector, во само неколку минути бил регистриран огромен број пријави за проблеми, а податоците на Ројтерс покажуваат дека дефектот ги погоди корисниците во САД, Велика Британија, Сингапур, земјите од Балканот и многу други делови од светот.
Најголемиот дел од пријавите, повеќе од 60 проценти, се однесуваат на нефункционирање на веб-страницата, околу 26 проценти на проблеми со најавувањето, додека кај Инстаграм корисниците пријавуваат дека содржините воопшто не се вчитуваат или се отвораат исклучително бавно.
И во Македонија голем број корисници пријавуваат дека десктоп верзијата на Фејсбук речиси не функционира, додека мобилните апликации кај дел од нив сè уште работат, но со значителни забавувања при испраќање пораки и вчитување фотографии и видеа.
Во моментов, единствената голема платформа во сопственост на Meta што функционира без позначителни проблеми е WhatsApp.
Од компанијата на Марк Закерберг засега нема официјално објаснување за причините за глобалниот прекин. Во меѓувреме, на социјалната мрежа X хаштагот #FacebookDown стана еден од најкоментираните, а дел од корисниците шпекулираат за можен хакерски напад. Сепак, ИТ експерти оценуваат дека најверојатно станува збор за интерен технички проблем, како неуспешно имплементиран код или дефект во DNS инфраструктурата на компанијата.
Експертите им препорачуваат на корисниците да не ги бришат апликациите и да не се обидуваат постојано повторно да се најавуваат, бидејќи тоа може дополнително да предизвика привремено блокирање на нивните профили.
Според последните информации, инженерските тимови на Meta веќе работат на отстранување на дефектот, а постепено нормализирање на услугите се очекува во текот на денот.
