Центарот за јавно здравје Тетово – Епидемиолошката служба во Гостивар попладнево официјално прогласи епидемија на подрачјето на општина Гостивар, откако бројот на заболени од стомачни инфекции го надмина утврдениот неделен праг.
Информацијата ја објави порталот „Гостиварпрес“, повикувајќи се на надлежните здравствени служби.
„Поради зголемен број заболени и надминување на лимитот на неделно ниво, пријавуваме епидемија на подрачјето на Гостивар. Редовно ја следиме состојбата, вршиме епидемиолошки анкети со заболените пациенти и се преземаат сите неопходни мерки“, информираа од Епидемиолошката служба.
Здравствените власти и натаму будно ја следат состојбата, бидејќи бројот на пациенти со симптоми на гастроинтестинални инфекции продолжува да расте.
Само во последните 24 часа, на Инфективното одделение во гостиварската болница биле прегледани околу 200 пациенти, додека на Одделението за педијатрија лекарска помош побарале уште околу 110 деца.
Најголемиот дел од пациентите се јавиле со симптоми како дијареја, повраќање и дехидрација, кои се најчести кај ваков тип инфекции.
Дополнително, во истиот период, во службата за Итна медицинска помош биле регистрирани уште 290 пациенти.
Надлежните институции продолжуваат со епидемиолошкиот надзор, ги анкетираат заболените лица и спроведуваат мерки за спречување на понатамошното ширење на инфекцијата, додека граѓаните се повикуваат строго да ги почитуваат препораките на здравствените власти.
