Русија во текот на ноќта изврши масовен напад со балистички ракети и беспилотни летала врз Украина, при што најтешко беа погодени Киев и Харков. Според украинските власти, најмалку пет лица загинаа, а најмалку 35 се повредени.
Во Харков, четири лица го загубија животот, додека 19 се повредени по напад врз поштенски терминал во предградието на градот. Загинатите се мажи на возраст меѓу 24 и 62 години, а неколкумина од повредените се во тешка состојба, соопшти гувернерот на Харковската област, Олег Синјехубов.
Во Киев загина едно лице, а уште 16 се повредени. Украинскиот претседател Володимир Зеленски го опиша нападот како „еден од најмасовните балистички напади врз главниот град“ од почетокот на целосната руска инвазија во февруари 2022 година.
Според украинските воздухопловни сили, Русија во нападот употребила балистички ракети „Искандер“, хиперсонични ракети „Циркон“ и вкупно 125 беспилотни летала. Противвоздушната одбрана успеала да собори 18 од вкупно 41 ракета насочена кон Киев, како и 108 дронови.
Градоначалникот на Киев, Виталиј Кличко, соопшти дека се оштетени станбени и деловни објекти, меѓу кои супермаркет и студентски дом. Пожарникарите со часови се бореле со пожарите во две големи складишта, додека украинската служба за вонредни состојби соопшти дека погоден бил и логистички центар во округот Буча, каде што две лица биле повредени.
Зеленски објави дека само во изминатата седмица Русија употребила околу 1.450 ударни дронови, повеќе од 1.640 наведувани авиобомби и 99 ракети од различни типови против Украина.
Во исто време, Украина продолжи со напади врз руска територија. Зеленски соопшти дека единици на Службата за безбедност на Украина (СБУ) истовремено погодиле три складишта за нафта и уште еден објект од горивниот сектор во рускиот регион Ставропол.
Дополнително, според украинскиот претседател, биле погодени и три руски танкери од таканаречената „сенка флота“ во Црното Море.
„Им благодарам на сите наши единици кои придонесуваат во Русија да се сфати дека оваа војна мора да заврши“, порача Зеленски.
Каспискиот нафтоводен конзорциум (Caspian Pipeline Consortium), преку кој се транспортира казахстанска нафта до руското црноморско пристаниште Новоросијск, потврди дека негов терминал бил погоден во нападот. Според компанијата, оштетени се два танкери, поради што е привремено запрено товарењето на нафта. Не се пријавени повредени ниту излевање на нафта.
Гувернерот на Ставропол соопшти дека напад со дрон предизвикал пожар во индустриски парк во регионот.
Од руска страна беше соопштено и дека во украински напади загинале седум лица, а 25 се повредени во објект во градот Тамбов, околу 475 километри југоисточно од Москва. Во друг напад врз магацин на компанијата „Вајлдберис“ (Wildberries) во Електростал, во близина на Москва, загинало едно лице, а 37 биле повредени.
Компанијата „Вајлдберис“, која често се нарекува руски еквивалент на „Амазон“, е дел од групацијата RWB, чија вредност според „Форбс Русија“ во 2026 година се проценува на околу 12,6 милијарди долари.
Украина во последните недели значително ги интензивира нападите врз руската енергетска инфраструктура. Киев тврди дека речиси 43 проценти од рускиот капацитет за преработка на нафта бил оневозможен како резултат на овие операции, иако оваа бројка не е независно потврдена.
Украинските власти нагласуваат дека нафтените и гасните постројки се легитимни воени цели бидејќи приходите од извозот на фосилни горива се клучен извор за финансирање на руската воена инвазија.
Во меѓувреме, Зеленски повторно ги повика европските сојузници да ја зголемат испораката на системи за пресретнување балистички ракети.
„Заштитата од балистички ракети во моментов е наш највисок и постојан приоритет. Пресретнувачи ни се потребни секој ден“, порача украинскиот претседател.
