Претседателката на Индија, Драупади Мурму, денеска пристигна во тридневна официјална посета на Република Македонија, што претставува прва посета на индиски шеф на држава од воспоставувањето на дипломатските односи меѓу двете земји.
Посетата е дел од нејзината европска турнеја, која ги опфаќа и Молдавија и Романија, а се оценува како важен чекор кон продлабочување на политичката, економската и културната соработка меѓу Скопје и Њу Делхи.
Во текот на престојот, Мурму ќе оствари средби со државниот врв, на кои ќе се разговара за унапредување на билатералните односи, зголемување на трговската размена, привлекување инвестиции, како и за соработка во областа на информатичката технологија, образованието и науката. Предвидени се и средби со претставници на бизнис-заедницата, како и настани посветени на јакнење на културните врски меѓу двете земји.
Посебно симболично значење на посетата ѝ дава фактот што Скопје е родниот град на Света Мајка Тереза, личност која ужива огромна почит во Индија и претставува важен мост на пријателството меѓу двата народа.
Драупади Мурму ја извршува функцијата претседател на Индија од јули 2022 година. Таа е првата претседателка која потекнува од домородната заедница Сантал и најмладата личност што била избрана на оваа функција. Претходно беше пратеничка, министерка во сојузната држава Одиша, а од 2015 до 2021 година беше гувернер на Џарканд, како прва жена на таа должност.
Иако претседателската функција во Индија има претежно церемонијален карактер, Мурму активно ја претставува земјата на меѓународната сцена, со фокус на зајакнување на дипломатските и економските партнерства.
Поради официјалната посета, која ќе трае до 23 јули, во Скопје е воведен посебен режим на сообраќај во поширокото централно градско подрачје. Од МВР апелираат до граѓаните да ги почитуваат упатствата и наредбите на полициските службеници со цел непречено одвивање на активностите поврзани со посетата.
…
