Три лица го загубија животот во тешка сообраќајна несреќа на патниот правец од граничниот премин Блаце кон Скопје, откако беше пронајден превртен автомобил „мерцедес“ со германски регистарски таблички.
Од Министерството за внатрешни работи информираат дека на 19 јули во 22:35 часот во СВР Скопје било пријавено дека покрај патот се наоѓа превртено возило.
Полициски службеници веднаш излегле на местото на несреќата, каде што било утврдено дека во автомобилот се наоѓаат три починати лица – еден маж и две жени. Смртта ја констатирал лекар од Итната медицинска помош.
Според информациите од МВР, претходно истиот ден, во 13:40 часот, во Полициската станица Бит Пазар, државјанин на Косово пријавил исчезнување на три лица. Тој навел дека последниот контакт со нив го имал на 18 јули околу 22:15 часот, кога тие се наоѓале на Меѓународниот аеродром во Скопје.
Засега не е официјално потврдено дали станува збор за истите лица, а надлежните институции преземаат мерки за утврдување на нивниот идентитет, како и за целосно расчистување на околностите под кои се случила трагичната несреќа.
