Бугарската влада подготвува амбициозен план со кој повеќе од 800 километри нови автопати, тунели и мостови ќе бидат изградени преку моделот на јавно-приватно партнерство (ЈПП), со цел да се забрза развојот на патната инфраструктура и да се намали товарот врз државниот буџет.
Според бугарските медиуми, сите целосно нови автопатски проекти ќе бидат понудени на концесија на приватни инвеститори. Меѓу приоритетните проекти се автопатот Русе – Велико Трново – граничниот премин „Маказа“, автопатот „Црно Море“, кој треба да ги поврзе Варна и Бургас, автопатот „Рила“, како и тунелот под Петрохан.
Властите најавуваат дека во следните две години ќе се изработат потребните економски анализи, ќе се усвојат урбанистичките планови и ќе се завршат експропријациите, по што проектите ќе им бидат понудени на домашни и странски инвеститори.
Во меѓувреме, веќе започнатите инфраструктурни проекти, како делниците од автопатот „Хемус“, брзиот пат Видин – Ботевград и трасата Русе – Бјала, ќе продолжат да се финансираат од државниот буџет.
Бугарските власти посочуваат дека моделот на јавно-приватно партнерство веќе успешно се применува во повеќе европски земји, меѓу кои Франција, Италија, Шпанија, Португалија, Грција и Хрватска.
Интерес за инвестирање во ваквите проекти, според информациите, веќе покажале компании од Катар, Турција и Кина, а новиот закон за јавно-приватно партнерство, кој се подготвува во соработка со Европската банка за обнова и развој, треба да обезбеди поголема правна сигурност за инвеститорите.
Во исто време, се најавуваат и промени за возачите. Според плановите на Европската комисија, до 2030 година електронските вињетки постепено треба да бидат заменети со систем на наплата според реално изминатата километража, што значи дека и патничките возила ќе плаќаат за користење на автопатите според поминатото растојание.
…
