Иранската Исламска револуционерна гарда (ИРГЦ) соопшти дека извела ракетен напад врз американски воени цели и инфраструктура во Бахреин, при што, според тврдењата на Техеран, бил погоден и центар за податоци на компанијата „Амазон“.
Во соопштението се наведува дека воздухопловно-вселенските сили на ИРГЦ употребиле повеќе крстосувачки ракети, а цел на нападот биле објекти во областите Мухарак и Рифа, вклучувајќи системи за противвоздушна одбрана, радарски инсталации и, како што тврдат иранските власти, инфраструктура поврзана со американската компанија „Амазон“.
Засега нема независна потврда за овие тврдења. Властите на Бахреин, Соединетите Американски Држави и компанијата „Амазон“ сè уште не објавиле официјален став за наводниот напад.
Од ИРГЦ наведуваат дека акцијата била одговор на, како што велат, американски напад врз цивилни објекти во изградба во Дарховин. Во меѓувреме, Иран ја повика Меѓународната агенција за атомска енергија (МААЕ) и Советот за безбедност на Обединетите нации да го осудат американскиот напад врз нуклеарната централа Дарховин.
Од МААЕ соопштија дека ги разгледуваат информациите за инцидентот, но засега немаат објавено независна процена или потврда за случувањата.
Ситуацијата дополнително ги зголемува тензиите на Блискиот Исток, каде во изминатиот период зачестија меѓусебните обвинувања и закани меѓу Иран и Соединетите Американски Држави.
…
