Силното невреме што попладнево го зафати Скопје остави зад себе повредени лица и значителна материјална штета низ повеќе делови од градот.
Според информациите, вкупно осум лица побарале медицинска помош и се згрижени во скопските болници. Дел од повредените се примени во Ургентниот центар, додека останатите се лекуваат во Градската општа болница „Св. Наум Охридски“ и во Клиничката болница „8 Септември“.
Најтешко е повредена 86-годишна жителка на Чаир, врз која паднало дрво. Таа е пренесена во Ургентниот центар со сериозни повреди на главата. Во болницата „8 Септември“ лекарска помош побарало и лице со расеченица на челото.
Надлежните институции најавуваат дека во текот на вечерта ќе соопштат дополнителни информации за состојбата на повредените.
Невремето, проследено со силен ветер и пороен дожд, предизвика хаос во повеќе скопски населби. Соборени се бројни дрвја, оштетени се покриви на објекти, а падна и големиот јарбол на кружниот тек кај трговскиот центар „Ист гејт“. Проблеми беа регистрирани и на Меѓународниот аеродром Скопје, каде поради прокиснување на покривот во делови од терминалната зграда се насобра вода.
…
