По силното попладневно невреме што го зафати Скопје, Управата за хидрометеоролошки работи (УХМР) издаде ново предупредување за уште еден нестабилен атмосферски бран кој се приближува кон земјава од правец на Албанија, Косово и Црна Гора.
Според најновите информации, за разлика од претходното невреме кое беше проследено со силен ветер, овојпат главната опасност ќе бидат интензивните и локално обилни врнежи од дожд. Атмосферскиот систем веќе се движи кон територијата на Македонија, а метеоролозите апелираат граѓаните внимателно да ги следат официјалните информации и предупредувања.
Новото предупредување доаѓа само неколку часа по невремето што предизвика значителни материјални штети во Скопје. До Центарот за управување со кризи преку бројот 112 биле пријавени повеќе од 1.000 случаи, додека силниот ветер откорна покриви, собори дрвја и оштети автомобили, електрична инфраструктура и објекти.
Надлежните служби и понатаму се на терен и работат на отстранување на последиците, а граѓаните се повикуваат да избегнуваат движење низ ризични подрачја и да бидат особено внимателни поради можноста од нови обилни врнежи и локални поплавувања.
…
