Сезонските промени на гумите можат да бидат минато за многу возачи благодарение на целогодишните гуми, кои во последните години стануваат сè попопуларен избор. Тие овозможуваат користење во текот на целата година без менување на летни и зимски гуми, но експертите предупредуваат дека тоа не значи дека не бараат редовно одржување.
Најчестата грешка што ја прават возачите е занемарувањето на ротацијата на гумите. Според стручњаците, редовното преместување на гумите меѓу предната и задната оска е клучно за нивно рамномерно трошење и подолг век на траење.
Кај автомобилите со преден погон, кои се најзастапени на патиштата, предните гуми се трошат побрзо бидејќи истовремено управуваат со возилото, сопираат и ја пренесуваат силата на моторот на подлогата.
Доколку гумите долго време останат на истите позиции, може да дојде до значителна разлика во истрошеноста, што влијае врз стабилноста на возилото и безбедноста при возење.
Според препораките на германскиот автоклуб АДАК, целогодишните гуми треба да се ротираат на секои 10.000 до 15.000 изминати километри. Возачите кои најчесто возат во град, поминуваат кратки релации или управуваат потешки возила, како електрични автомобили, треба почесто да ја проверуваат состојбата на гумите.
Начинот на ротација зависи од видот на гумите. Кај насочените гуми, тие најчесто се преместуваат само на истата страна од возилото, додека кај асиметричните гуми може да важат други правила според упатствата на производителот.
Експертите посочуваат и дека доколку се менуваат само две гуми, новите секогаш треба да се постават на задната оска. Причината е што задните гуми имаат важна улога во стабилноста на автомобилот, особено при свиоци, нагли маневри и возење по влажен коловоз.
Покрај ротацијата, возачите треба најмалку еднаш месечно да го проверуваат притисокот во гумите. Неправилниот притисок може да предизвика побрзо трошење, зголемена потрошувачка на гориво и подолг пат на сопирање.
Редовната проверка на длабочината на шарата е исто така неопходна. Иако законскиот минимум во повеќето европски земји е 1,6 милиметри, стручњаците советуваат гумите да се заменат и порано, особено пред зимскиот период, бидејќи со истрошената шара се намалува прилепувањето на мокар пат и снег.
Правилното одржување на гумите не само што може да заштеди пари, туку и значително да ја зголеми безбедноста на патиштата.
…
