Иран испрати ново предупредување до Бугарија поради плановите за привремено распоредување на американски авиони-танкери во воената база Безмер. Техеран порача дека Софија не смее да дозволи нејзината територија да биде искористена за какви било операции насочени против Иран.
Според иранското Министерство за надворешни работи, секоја поддршка за евентуални американски воени акции би значела соучество во, како што наведуваат, „агресија и воени злосторства“. Предупредувањето доаѓа откако бугарската влада предложи во базата Безмер да бидат сместени до осум американски авиони KC-135 за воздушно полнење со гориво.
Ова не е првпат Иран да испрати ваква порака до Софија. И во април, Техеран преку дипломатска нота побара Бугарија да не дозволува американските сили да ги користат нејзините аеродроми за операции против Иран.
Од бугарска страна ги отфрлаат ваквите обвинувања. Министерството за надворешни работи соопшти дека бугарската територија нема да се користи за воени операции на Блискиот Исток и дека распоредувањето на американските авиони е исклучиво во рамките на одбранбената соработка со НАТО.
Сличен став имаат и САД. Од Европската команда на американската армија наведуваат дека присуството на авионите е дел од зајакнувањето на одбранбените капацитети на источното крило на Алијансата и дека не е поврзано со офанзивни операции против Иран.
Во меѓувреме, бугарската влада повика на намалување на тензиите и враќање на дипломатскиот дијалог меѓу Вашингтон и Техеран, нагласувајќи дека не презема непријателски чекори кон Иран. Ситуацијата се развива во период на обновени тензии меѓу двете земји по пропаѓањето на договорот за привремен прекин на огнот.
…
