Силно невреме проследено со обилни врнежи и силен ветер ја погоди јужна Албанија, при што загинаа две лица, а уште тројца се повредени, јавуваат албанските медиуми.
Една од жртвите е електричарот Башким Бочи, вработен во државната електроенергетска компанија OSSH, кој загинал при интервенција за отстранување дефект на далновод во областа Потами кај Химара. Според информациите, тој паднал од електричен столб откако му се скинал безбедносниот појас.
Втората жртва е рибарот Михал Зои од Ксамил. Неговиот чамец се превртел поради разбрануваното море, а неговото тело било пронајдено утринава.
Во Саранда, силните ветрови собориле десетици дрвја, при што биле оштетени повеќе возила. Тројца граѓани побарале медицинска помош поради повреди од искршено стакло и паднати гранки.
Невремето предизвикало проблеми и во други делови на земјата. Во Либражд дел од населението останало без електрична енергија, додека прекините во снабдувањето со струја довеле и до проблеми со водоснабдувањето, особено во Патос.
