Хрватска порача дека решавањето на отворените билатерални прашања со Црна Гора е неопходен предуслов за успешно завршување на преговорите за членство на Подгорица во Европската Унија.
Во соопштение на хрватското Министерство за надворешни работи се наведува дека Загреб очекува напредок по неколку клучни прашања, меѓу кои се обештетување на поранешните затвореници во логорите, продолжување на потрагата по 14 исчезнати лица од времето на Војната за независност и процесуирање на сторителите на воени злосторства.
Хрватската страна бара и решавање на имотните прашања на хрватските семејства кои останале без имот во Црна Гора, зачувување на спомен-обележјето на местото на поранешниот логор Морин, продолжување на разговорите за поморската граница, како и враќање на школскиот брод „Јадран“.
„Остануваат само неколку месеци до крајот на 2026 година, па затоа уште еднаш ја повикуваме црногорската страна да се вклучи во конструктивен дијалог и да ја забрза работата на отворените прашања“, наведува хрватското Министерство.
И покрај овие барања, Црна Гора и понатаму се смета за најнапреден кандидат за членство во Европската Унија. Досега се привремено затворени 18 од вкупно 33 преговарачки поглавја, а Европската Унија веќе го одобри почетокот на изработката на нацрт-договорот за пристапување, што претставува последна фаза од преговорите.
Европската комисија усвои и финансиска рамка во вредност од речиси 3,2 милијарди евра, врз основа на проценката дека Црна Гора би можела да стане полноправна членка на Европската Унија во 2028 година.
Од Загреб потенцираат дека добрососедските односи остануваат еден од основните политички критериуми во процесот на проширување на ЕУ и дека нерешените билатерални прашања не смеат да го оптоваруваат пристапниот процес.
