Јеменските бунтовници Хути соопштија дека извршиле напад врз два саудиски нафтени танкери во Црвеното Море, а според извештаи од поморските безбедносни служби, еден од бродовите бил погоден и се запалил.
Станува збор за танкерот „Енцелија“ под саудиско знаме, кој испратил повик за помош откако бил погоден од ракета додека се наоѓал во близина на саудиското пристаниште Џизан.
Британската компанија за поморски ризици „Вангард“ информираше дека бродот бил погоден од непознат проектил околу 70 наутички милји југозападно од Ал Шукаик, при што избувнал пожар на танкерот.
Информацијата ја потврди и британската Агенција за поморски трговски операции (UKMTO), која соопшти дека капетанот на бродот пријавил ракетен удар и пожар, кој екипажот успеал да го стави под контрола. Засега нема информации за повредени лица или еколошки последици.
Хутите тврдат дека ги нападнале танкерите „Енцелија“ и „Лалја“ со балистички и крстосувачки ракети, обвинувајќи ги дека ја прекршиле поморската блокада што ја воведоа кон Саудиска Арабија. Вториот напад врз танкерот „Лалја“ засега не е независно потврден.
Ова е најнова ескалација во регионот, откако Хутите најавија блокада на саудиските пристаништа во Црвеното Море и предупредија дека ќе ги напаѓаат бродовите што ќе продолжат да пловат кон нив.
Напнатоста во оваа стратешки важна поморска рута расте, бидејќи низ теснецот Баб ал-Мандеб, кој го поврзува Црвеното Море со Аденскиот Залив, поминува значителен дел од светската трговија со нафта.
Нападите врз танкерите дополнително ги зголемуваат стравувањата од нарушување на глобалното снабдување со енергија, особено по проблемите со транспортот низ Ормускиот Теснец поради регионалните тензии.
…
