Едно лице го загуби животот во пукање што се случи денеска во селото Стреоц, во близина на Дечани, соопшти косовската полиција.
Според првичните информации, инцидентот се случил во семеен двор, а истражителите се сомневаат дека станува збор за ненамерно пукање меѓу членови на едно семејство.
Портпаролот на полицијата за регионот Пеќ, Дритон Ругова, информираше дека пријавата била примена во 13:42 часот, по што полициски екипи веднаш излегле на местото на настанот.
„Добивме информација дека едно лице е пронајдено мртво во дворот. Се сомневаме дека станува збор за убиство од небрежност меѓу членови на семејството. Запленето е едно огнено оружје, а полициските единици се на терен“, изјави Ругова.
На местото пристигнал и дежурен обвинител од Основното обвинителство во Пеќ, кој заедно со полицијата ги презема потребните истражни дејствија.
Од обвинителството велат дека во овој момент не можат да споделат повеќе детали, додека трае истрагата за расчистување на околностите под кои се случила трагедијата.
