Двајца 22-годишни мажи од Штип и Псача се соочуваат со кривична пријава откако, според сомнежите на полицијата, се обиделе да влезат во дом на 85-годишна жена во Штип, претставувајќи се како полициски службеници.
СВР Штип поднесе кривична пријава против Е.Џ. (22) од Штип и Д.С. (22) од селото Псача, општина Ранковце, поради постоење основи на сомнение за сторено кривично дело „лажно претставување“.
Од Министерството за внатрешни работи информираат дека на 2 јули 2026 година, пријавените пристигнале пред домот на повозрасната жена во Штип и се обиделе да влезат во нејзиниот дом, при што лажно се претставиле како полициски службеници.
Нивниот обид бил спречен благодарение на соседка која се посомневала во нивното однесување и веднаш го пријавила случајот во полиција.
По преземените оперативни мерки, полициски службеници ги пронашле двајцата и ги лишиле од слобода. Од МВР велат дека по целосното документирање на случајот ќе следува соодветна законска постапка.
Полицијата повторно апелира до граѓаните, особено до повозрасните лица, да бидат внимателни со непознати лица кои се претставуваат како службеници и секогаш да го проверат нивниот идентитет. Во случај на сомневање, граѓаните се повикуваат веднаш да пријават во полиција.
