Портпаролот на Кремљ, Дмитриј Песков, денеска ги оцени како „монструозни“ изјавите на новиот врховен командант на вооружените сили на Украина, Михаил Драпатиј.
Песков, коментирајќи ги изјавите кои се појавија на социјалните мрежи, изјави дека ваквата реторика покажува дека Киев не е подготвен за мирно решение на конфликтот.
„Што се однесува до Драпатиј, таа изјава е монструозна. Пред сè, таа покажува дека тој е нацист. Потоа, покажува дека тој и луѓето слични на него нема до крај да дозволат кој било од киевскиот режим да постигне мирно решение“, изјави Песков.
Според Кремљ, со ваквите ставови Драпатиј ја потврдил, како што ја нарекува Москва, исправноста на „специјалната воена операција“. Песков додаде дека е уверен оти украинскиот командант ќе сноси одговорност за кажаното.
Спорните изјави на Драпатиј беа објавени од медиумот NEXTA на платформата X, со напомена дека интервјуто е снимено пред тој официјално да ја преземе функцијата.
Во објавениот исечок се наведува дека Драпатиј за граѓаните на Русија рекол дека се „нација која нема право на постоење“ и дека „илјадници години ништо цивилизирано не се сменило таму – ниту менталитетот, ниту империјалните амбиции“.
За населението во Донбас, пак, според Песков, новиот командант изјавил дека не станува збор за свесно население, туку за луѓе кои не сакаат да работат и сакаат се да добијат бесплатно.
Од украинска страна засега нема официјална реакција на изјавите на Песков.
…
