Москва призна дека намерно ја гаѓала изложбата „Армада“, Киев најави истрага и ден на жалост
Најмалку 10 лица загинаа, а над 100 се ранети во руски балистички напад врз изложба на одбранбената индустрија во Киевската област, што се случи вчера околу 11:20 часот по локално време.
Сирените за воздушен напад се огласија сред бел ден, што е невообичаено бидејќи досегашните напади врз главниот град на Украина се изведуваа главно ноќе. Според украинските воздухопловни сили, Русија лансирала три балистички ракети, од кои една била пресретната.
Русија: Намерно ја гаѓавме изложбата
Руското Министерство за одбрана синоќа ја презеде одговорноста за нападот, соопштувајќи дека намерно ја гаѓало изложбата на која биле претставени дронови од украинско и странско производство.
Во соопштението се наведува дека на локацијата биле изложени „беспилотни летала од украинско и странско производство, вклучувајќи идни модели“, за кои Москва тврди дека се користени за напади врз цивилни цели во Русија.
Нападот се случил на приватен полигон за обука „Академија за цивилна безбедност“ во близина на селото Капитановка, во реонот Буча, покрај автопатот кон Житомир. Изложбата била јавно најавена под името „Армада“ како презентација на „сеопфатни решенија за заштита на клучната инфраструктура од современи воздушни закани“.
Завршена спасувачката акција, Киев најави истрага
Украинската Државна служба за вонредни ситуации соопшти синоќа околу 23:10 часот дека спасувачката акција е завршена. На фотографиите се гледаат спасувачи како пребаруваат урнатини во близина на станбени куќи.
Претседателот Володимир Зеленски го осуди нападот:
„Илјада пати рековме дека во воени услови, со ваков непријател, апсолутно е неприфатливо да се одржуваат изложби на оружје на кои се собира голем број луѓе, особено во близина на станбени згради“, рече Зеленски во своето вечерно обраќање, нарекувајќи ги нападите „брутални напади врз цивили“.
Главниот обвинител Руслан Кравченко соопшти дека се отворени две кривични постапки – една за кршење на законите и обичаите на војувањето и втора за можно неправилно вршење на службената должност при организирање на настанот.
„Војната никого не ослободува од одговорност за управувачките одлуки. Напротив – бара максимална професионалност“, напиша тој.
Гласноговорникот на Генералштабот на украинската војска изјави дека настанот се одржувал на локација која не е во негова надлежност, но дека секој таков настан бара „максимални безбедносни мерки“.
Според дописникот на Би-Би-Си за Украина, Виталиј Шевченко, на изложбата присуствувале клучни експерти и производители, поради што нападот би можел да биде голем удар за украинската индустрија за дронови.
Вршителот на должноста гувернер на Киевската област, Руслан Олијник, најави дека денеска во регионот ќе биде прогласен ден на жалост.
…
