Министерот за надворешни работи и надворешна трговија Тимчо Муцунски со остра реакција до поранешниот шеф на дипломатијата Бујар Османи.
Муцунски порача дека Османи е последниот кој има право да држи лекции за тоа што е прифатено, а што не, бидејќи, како што вели, многу добро знае што преговарал, што прифаќал и во каква позиција ја остави државата.
„Затоа, денес нека не троши енергија за да ги извртува фактите и да толкува туѓи изјави“, наведува Муцунски.
Во реакцијата, министерот се осврнува и на политичкиот легитимитет на Османи по локалните избори.
„Политичар кој не успеа да ја добие довербата ниту на своите најблиски сограѓани во Чаир, ниту на своите соседи, ниту на луѓето што најдобро го познаваат, навистина е последниот што треба да држи лекции за политички легитимитет. По таков пораз, многумина би покажале политичка одговорност и би се повлекле, наместо да продолжат да делат лекции.“
Муцунски потенцира дека позицијата на Владата е јасна и непроменета од првиот ден и дека обвинувањата за попуштање не се оствариле.
„Повеќе од две години слушаме обвинувања дека ќе попуштиме, ќе се откажеме и ќе прифатиме сè што претходно било договорено. Наместо тоа, со дела покажавме доследност, принципиелност и јасна заштита на македонските национални интереси. Тоа денес е јасно и дома и кај нашите меѓународни партнери.“
„Политичката меморија не е толку кратка колку што би сакал. Граѓаните знаат кој ја доведе државата во оваа ситуација. И знаат кој денес се обидува да избега од сопствената одговорност“, заклучува Муцунски.
…
