Летување без пробивање на буџетот оваа година е најисплатливо во Португалија, Бугарија и Шпанија
Семејниот одмор на море ова лето може да чини двојно поевтино или поскапо во зависност од тоа каде патувате, покажува најновиот извештај на британската компанија „Post Office Travel Money“ за 2026 година, пренесува „Daily Mail“.
Истражувањето анализирало 22 популарни европски летувалишта и ги споредило цените на 10-те најчести туристички трошоци – од кафе, пиво, вино и безалкохолни пијалоци, до ручек, вечера за четиричлено семејство, крема за сончање и средство против инсекти.
Заклучокот е јасен – разликите никогаш не биле поголеми.
„Поради големите разлики во трошоците, важно е патниците да бидат добро информирани пред да патуваат за да знаат колку пари ќе им бидат потребни за секојдневните трошоци на одмор“, изјави Лаура Планкет, раководител на одделот за патни пари во компанијата.
Португалија на врвот
Убедлив победник е Алгарве во Португалија. Со просечна кошничка од околу 140 фунти за 10 основни производи, овој регион е прогласен за најдобра вредност за парите, а цените се дури и пониски од лани.
Таму кафе чини околу 1,30 фунти, пиво 2,60 фунти, а чаша вино 3,50 фунти.
Бугарија веднаш зад лидерот
Второто место го зазема Сончев Брег во Бугарија, каде што семејна вечера со пијалоци е меѓу најевтините во Европа.
Третото место му припадна на Ланзароте на Канарските Острови, а доминацијата на Шпанија ја потврдуваат и Менорка, Коста Брава, Тенерифе, Коста дел Сол и Коста Бланка, кои влегоа во топ 10.
Турција повеќе не е ефтина
Интересен е падот на Турција. Мармарис, кој лани беше на врвот како најевтин, оваа година падна на 7. место. И покрај слабата лира, цените таму скокнале за над 20% за една година.
Топ 10 ја затвора Пафос на Кипар.
Листа на 10 најевтини дестинации за 2026:
- Алгарве, Португалија
- Сончев Брег, Бугарија
- Ланзароте, Шпанија
- Менорка, Шпанија
- Коста Брава, Шпанија
- Тенерифе, Шпанија
- Мармарис, Турција
- Коста дел Сол, Шпанија
- Коста Бланка, Шпанија
- Пафос, Кипар
На спротивниот крај е Соренто во Италија – најскапото летувалиште во истражувањето. Само вечера за четири лица чини околу 150 фунти, а вкупните дневни трошоци достигнуваат 268 фунти, речиси двојно повеќе од Алгарве.
Извештајот открива и дека 85% од семејствата на крајот трошат повеќе од планираното, најмногу на храна и пијалоци.
…
